អ្នកស្រែស្រណោះស្រូវ

ជីវិតអ្នកស្រែ មិនដែលស្គាល់ទេ ខោអាវថ្មីៗ

ជើងនៅក្នុងភក់ ប្រឡាក់ជាប់ដី ក្រោមកំដៅថ្ងៃ

នឿយហត់គ្មានល្ហែ ។

នង្គ័លរនាស់ ភ្ជួររាស់កាប់គាស់ គ្មានពេលទំនេរ

ដកស្ទូងដាំស្រូវ បូមទឹកដាក់ស្រែ ខំថែស្រែម៉ែ

ក្រែងផលជាងមុន ។

ជួនភ្លៀងតិចតួច ឆ្នាំខ្លះរាំងស្ងួត ឆ្នាំខ្លះជំនន់

ឆ្នាំខ្លះភ្លៀងគ្រប់ ក៏បានផលគុណ ផលច្រើនជាងមុន

ស្រូវផ្លែពេញស្រែ ។

រដូវច្រូតស្រូវ ឃើញម៉ែនិងឪ ញញឹមក្នុងស្រែ

ពស់ផលស្រូវល្អ មានសង្ឃឹមដែរ លក់ខ្លះសងគេ

ខ្លះហូបប្រចាំថ្ងៃ ។

ប្រមូលផលហើយ ទុក្ខធំឥតស្បើយ ស្រូវធ្លាក់តម្លៃ

អង្គុយក្នុងស្រែ ខ្លួនប្រាណល្ហិតល្ហៃ សង្ឃឹមស្រូវថ្លៃ

តែគិតខុសមែន ។

ស្រែគ្មានលំនឹង អ្នកស្រុកលែងពឹង រត់ទៅថៃឡង់

ខ្លះទៅទីក្រុង ខ្លះធ្វើសំណង់ ផ្ដុំគ្នាឡើងណែន

នៅឯភ្នំពេញ ។

ខ្លះទៅកូរ៉េ ខ្លះទៅម៉ាឡេ ទាំងទុក្ខទោម្នេញ

ទៅធ្វើខ្ញុំគេ ខ្លះគេវាយដេញ រត់មកស្រុកវិញ

ព្រោះទៅខុសច្បាប់ ។

និពន្ធដោយ : លោក រ៉ឹម ភារី ( អ្នកយកព័ត៌មានរបស់គេហទំព័រថ្មីៗ )

ដកស្រង់ចេញពី គេហទំព័រថ្មីៗ